Færavindur DNG hafa leikið stórt hlutverk á undanförnum árum í framþróun handfæraveiða og eru mikil tímamót nú þegar fyrirtækið er komið fram með nýja kynslóð af vindu sem heitir R1 en næsta kynslóð á undan var C6000 vindan sem kom fyrst á markað árið 1995.

Mótor vindunnar er sérhannaður af DNG fyrir færaveiðar, ekki er þörf fyrir kúplingu eða gír heldur er girnishjólið fest beint á mótoröxulinn. Mótorinn er svokallaður burstalaus þrepamótor. Engin kol eru inn á anker mótorsins heldur er hann útbúinn síseglum. Slitfletir eru einungis á tveimur legum í öxulendunum og viðhald þess í lágmarki.

DNG vindan er framleidd hjá DNG og er því íslensk framleiðsla. Allur vélbúnaður vindunnar (mótor, girnishjól og annar sjáanlegur búnaður) er hannaður og framleiddur af DNG. Útlit og hugbúnaður vindunnar er einnig hannaður af DNG. Aðkeyptir rafíhlutir eru í hæsta gæðaflokki og áður en hver færavinda er afgreidd fer hún í gegnum strangt gæðapróf þar sem allar stillingar eru prófaðar undir mismunandi álagi. Vindan er þrýstiprófuð undir vatni og er þess vegna algerlega vatnsþétt. 

DNG vindan inniheldur mörg mismunandi veiðikerfi, svo sem veiðikerfi fyrir þorsk, ufsa, makríl, smokk, beittan öngul, tröppukeip og ýmis leitarkerfi. Notandinn getur einnig útbúið sín eigin veiðikerfi og sín sérstöku keip og geymt í minni vindunnar. 

DNG vindan er háþróað veiðitæki sem tryggir fiskimönnum mikil afköst með litlum tilkostnaði. Færafiskur er talinn besta hráefnið, sem sýnir sig á fiskmörkuðum víðsvegar um heim. Út frá þessum staðhæfingum segir sig sjálft að færaveiðar er einhver hagkvæmasti veiðiskapur sem völ er á.